Sharqona pahlavaning eng qulay va oson retsepti

Turk tarixchisi Nuri Janlining aytishicha, mazkur shirinlik haqidagi ilk qaydlar XV asrga tegishli: “Pahlava uchun yupqa xamir tayyorlash anʼanasi ossuriyaliklardan kirib kelgan. Usmoniy sultonlar hayot kechirgan Topkapa saroyida Sulton Fotih davridan qolgan kitoblar saqlangan, unga koʻra tahmin qilish mumkinki, mazkur shirinlik ilk marta 1453 yilda sulton saroyida tayyorlab koʻrilgan. Aytishlaricha, shirinlik sultonga shunchalar yoqib qolganki, uni har bayramda tayyorlash uchun buyruq bergan.

Kerakli masalliqlar:

420 gr un

1 dona tuxum

10 gr qavartma

1 oshqoshiq guruch sirkasi

taʼbga koʻra vanilin 

150 gr joʻxori kraxmali 

yarim choyqoshiq tuz

250 gr shakar (sirop uchun)

200 ml suv (sirop uchun)

2 oshqoshiq limon sharbati

1 dona dolchin tayoqchasi

ozroq kunjut

qovurish uchun oʻsimlik yogʻi

 

1. Idish ichiga tuxum chaqib, ustidan shakar, tuz va vanilin qoʻshiladi. 

2. Masalliqlar ketidan suv quyib, sirka hamda oʻsimlik yogʻi qoʻshiladi. 

3.   Idish ichiga un va qavartma qoʻshib, xamir qoriladi. Xamir stol ustida 10 daqiqa mushtlanadi. 

4.     Xamir uchta boʻlakka boʻlinadi va har biri sharcha koʻrinishiga keltirib olinadi. 

5. Xamir ustiga kraxmal sepib, yupqa shaklda yoyiladi. 

6. Yoyilgan xamir ustiga kraxmal sepiladi.

7. Xamir rulet shakliga keltiriladi.

8.  Ruletdan 1,5 sm qalinlikdagi boʻlaklar kesiladi. 

9.     Xamir boʻlaklari ustki tomonidan yoyiladi.Bunda uning qatlama tomoni ikki tarafga qarab turishi kerak.

10.   Xamir boʻlaklari qizdirilgan yogʻ ichiga solinadi va sanchqi yordamida qavatlari ochib chiqiladi. 

11.   Kastryulka ichiga suv, shakar va dolchin tayoqchasi solinib, qaynash holatiga keltiriladi.  Sirop 5-7 daqiqa davomida past olovda qaynatiladi. Sirop olov ustidan solingach, ichiga limon sharbati va asal qoʻshib aralashtiriladi.

12.   Tayyor pahlavalar sirop ichiga botirilgach, ustiga kunjut sepiladi.